【小朋友同大人分別 學新野唔係睇獎勵】
「點解嘅？咩嚟㗎？」
我湊外甥仔嘅時候，佢成日都會問我問題。送玩具會問我邊度買，我食嘢會問我係咩嚟，睇卡通片會問我劇情，每個小朋友都係好奇寶寶，對世界事物充滿好奇。但唔知由幾時開始，人越大，求知欲反而越嚟越少，又或者更在意背後「獎勵」同「成本」。
一條簡單問題，點解想進修讀書？相信十居其九會話為轉工、升職、搵錢、移民。無錯，以上答案都係事實，如果有人答係為興趣，真係要對嗰個人salute致敬，竟然有人咁pure咁true，使咁多錢唔係為回報，只係純粹滿足求知欲。
我記得美國俄亥俄州立大學有一個得意研究，電腦Mon上面，分別有四隻外星生物，click每隻外星生物，得到嘅虛擬糖果數量都唔同，其中一隻外星生物回報最多有10粒。測試目標有大人同小朋友，要喺100次click裡面得到最多糖果。你可以諗得到，大人知道邊隻外星生物最多回報後，就會用其餘所有次數去click佢，但係小朋友呢？結果發現小朋友知道邊隻外星生物最多糖果後，佢哋會繼續嘗試click其他外星生物。積係對於小朋友，寧願放棄豐厚回報，承擔更大風險發掘未知之數，新事物嘅吸引力比獎勵更加大。
大人同小朋友嘅分別，就係小朋友世界簡單得多。去學新野，大人都要考慮值唔值先去馬，相反小朋友心想就去做。究竟咩原因，令人大咗會有呢個轉變，社會充斥功利主義？太計較其他人目光？抑或教育制度令我哋失去學習動力？就由今日開始，回歸返細個時種初心，想知就上網搵資料，想學就去報名上堂，唔好考慮太多背後利益，咁樣做人都會簡單開心得多！
Search